Ibyo wamenya ku itsinda Miss Ingabire Grace yashyizwemo muri Miss World
Miss Ingabire Grace waserukiye u Rwanda mu irushanwa rya Miss World 2021 yashyizwe mu itsinda rya ‘Head to Head Challenge’ rya 13.
Ubusanzwe mu irushanwa rya Miss World, iyo umwe mu bahatana abaye uwa mbere muri buri tsinda ahita ahabwa amahirwe yo kwinjira mu kindi cyiciro cya Top 40, kiba kirimo abakobwa 40 bakomeza urugendo rwo guhatanira ikamba.
Muri iki gikorwa cyabaye ku wa 24 Ugushyingo 2021, Miss Ingabire Grace yashyizwe mu itsinda rya 13 ahuriyemo n’abakobwa bahagarariye ibihugu birimo u Bubiligi, Ireland, Colombia, Curacao, Finland.
Aba bakobwa uko ari batandatu bazagira umwanya wo kugirana ikiganiro mpaka bityo habeho amatora y’uwitwaye neza kurusha abandi.
Uzaba yatowe cyane niwe uzaba ari uwa mbere ahite ahabwa amahirwe yo kwinjira mu cyiciro cya Top 40, kiba kirimo abakobwa 40 bazatoranywamo uzatwara iri kamba.
Uretse abakobwa 15 baba bavuye mu matsinda, abandi 25 bagenda batoranywa bitewe n’amarushanwa atandukanye ategurwa muri Miss World.
Ni ku nshuro ya gatanu u Rwanda ruhagarariwe mu irushanwa rya Miss World riri kuba ku nshuro yaryo ya 70. Byitezwe ko ikamba rizatangwa ku wa 16 Ukuboza 2021 muri Puerto Rico.
