Menya abagize akanama nkemurampaka k’amajonjora ya Miss Rwanda 2022
Igikorwa cyo guhitamo Miss Rwanda 2022 kiratangira kuri uyu wa Gatandatu mu ijonjora ryacu rya mbere risiga hamenyekanye abazahagarira Intara y’Amajyaruguru riri kubera i Musanze.
Twishimiye kubagezaho abagize akanama nkemurampaka bazatanga amanota ku bakobwa mu majonjora y’ibanze y’uyu mwaka. Inteko y’akanama nkemurampaka igizwe na Mutesi Jolly, Umurerwa Evelyne na James Munyaneza
Abagize akanama nkemurampaka k’amajonjora y’ibanze ni bantu ki?
Mutesi Jolly yambitswe ikamba rya Miss Rwanda mu 2016. Ni we watangije ibiganiro bimaze kumenyekana cyane nka Inter-Generation Dialogue. Yabaye Umunyarwanda wa mbere witabiriye amarushanwa ya Miss World ahagarariye u Rwanda. Ni Visi Perezida wa Miss East Africa, irushanwa ry’ubwiza rihuza abakobwa bo mu bihugu bitandukanye muri aka karere u Rwanda ruherereyemo. Yatowe nka Best Female Celebrity mu 2019.
Umurerwa Evelyne afite uburambe bw’imyaka irenga 20 mu itangazamakuru rikoresha amashusho. Yagaragaye mu kanama nkemurampaka mu marushanwa atandukanye y’ubwiza haba ku rwego rw’Igihugu na kaminuza. Yatsindiye igihembo cy’Umunyamakuru w’Umugore witwaye neza mu 2018.
James Munyaneza ni umunyamakuru w’umwuga ufite uburambe bw’imyaka 20 muri iyo mirimo. Ni umwanditsi wa The NewTimes Rwanda, umutoza w’itangazamakuru akaba anatanga inyigisho zitandukanye muri kaminuza. Uyu ni umwaka wa kane agaragara mu kanama nkemurampaka muri Miss Rwanda.
