Miss Ingabire Grace yahuye n’abegukanye ikamba rya Miss World mu 2018 na 2019
Miss Ingabire Grace waserukiye u Rwanda mu irushanwa rya Miss World 2021, ku munsi wa mbere muri Puerto Rico ahagiye kubera iri rushanwa, yahahuriye n’abegukanye ikamba mu 2018 na 2019.
Irushanwa rya Miss World ryatangiye kuba ku nshuro ya 70, ubwo riheruka kuba ryegukanywe na Toni-Ann Singh wo muri Jamaica mu 2019 ari na we uzambika ikamba umukobwa uzatsinda muri uyu mwaka.
Toni-Ann Singh yari yagiyeho akurikiye umukobwa ukomoka muri Mexique wegukanye ikamba rya Miss World mu 2018 witwa Silvia Vanessa Ponce de León Sánchez ubusanzwe iwabo bita Vanessa Ponce.
Aba bakobwa bagiye guha ikaze barumuna babo, nibo baheruka kwegukana iri Kamba kuko mu 2020 ritigeze riba bitewe n’icyorezo cya Covid-19 cyari cyugarije Isi.
Ingabire Grace wageze muri Puerto Rico ku Cyumweru tariki 21 Ugushyingo 2021, yasangije abamukurikira ku mbugankoranyambaga, amafoto ari kumwe n’aba bakobwa bagiye gusura barumuna babo bazaturukamo undi wakwegukana iri kamba.
Byitezwe ko ikamba rya Miss World 2021 rizatangwa ku wa 16 Ukuboza 2021.
Miss Ingabire Grace uhagarariye u Rwanda yahize kwitwara neza agahesha ishema Igihugu mu ruhando rw’andi mahanga. Yashyizwe mu itsinda ryiswe Green Team muri iri rushanwa rya Miss World.
