Abakobwa 20 bahatanira ikamba rya Miss Rwanda 2021 basuye Bella Flowers
Abakobwa bahatanira ikamba rya Miss Rwanda 2021 bishimiye gusura uruganda rukomeye rwa Rwanda rwa Bella Flowers. Banyujijwe mu nzira zitandukanye zo gukora no gutunganya amaroza meza yoherezwa mu mahanga no ku isoko ryaho.
Umuyobozi Mukuru wa Bella Flowers, Emmy Nyirigira, yasogongeje aba bakobwa bari muri Miss Rwanda 2021 ku rugendo rw’iki kigo kuva mu 2016 ubwo cyatangiraga nk’ikigo gitunganya umusaruro w’indabo. Bella Flowers Ltd ikora ibikorwa byo gutunganya no kohereza hanze indabo z’umwimerere.
Isosiyete ya Bella Flowers ifitwe na Guverinoma y’u Rwanda. Kugeza ubu, indabyo za Bella Flowers ziri mu ngeri 18 za roza kuri hegitari 65. Ubu umushinga wose ukorera kuri hectari 100 harimo ubutaka bukoreshwa n’uburiho ibindi bikorwa remezo by’uyu mushinga nk’imihanda n’ibindi.
Umuyobozi Mukuru wa Bella Flowers, Emmy Nyirigira, yabwiye abakobwa bahatanira kuba Miss Rwanda 2021 ko iki kigo gitanga impuzandengo ya miliyoni 4 z’amashami asarurwa mu cyumweru, bikuzuza miliyoni 72 ku mwaka. Ati “Icyifuzo cyacu mu myaka 5 iri imbere ni ugusarura miliyoni 150 ku mwaka”.
Gukura kwa Bella Flowers nk’uruganda rukora indabo mu myaka 6 gusa, byerekana ko u Rwanda rufite ubushobozi bwo guhinga indabo. Kugeza ubu 80% by’iroza isaruwe yoherezwa hanze. Bella Flowers yaguye isoko ryayo i Burayi kandi iteganya gutangira kugemurira isoko rya Afurika y’Uburengerazuba.
Nubwo imbogamizi hari zatewe n’icyorezo cya COVID-19, Umuyobozi Mukuru wa Bella Flowers, Emmy Nyirigira, yatangaje ko iyi sosiyete yashoboye kwinjiza miliyari 6.5 z’amafaranga y’u Rwanda mu kugurisha indabo ahanini avuye mu kohereza indabo hanze y’igihugu.
Umuyobozi Mukuru wa Bella Flowers yavuze ko inganda z’indabo mu Rwanda zikiri nke cyane kandi ko hari amahirwe menshi yo kuzamura inganda ndetse n’umuco w’indabo. Yongeyeho ko iyi sosiyete iri gutegura gukoresha ibishoboka byose kugira ngo umuco wo kugura indabo mu Rwanda na ho utere imbere.
Hejuru yo kugeza ishusho y’u Rwanda ku Isi yose y’abatunganya indabyo, Bella Flowers yahaye abaturage bo mu Karere ka Rwamagana amahirwe yo kubona akazi. Iki kigo gikoresha abakozi bagera ku 1.000.
Umuyobozi Mukuru wa Bella Flowers yahaye impano y’indabo buri mukobwa mu rwego rwo kubashimira ku mwanya bafashe bagasura icyicaro cy’uru ruganda rw’indabo. Uyu mwaka ni uwa gatatu Bella Flowers ikorana na Miss Rwanda.
Iki kigo gikora ibijyanye n’indabo mu Rwanda izahemba igisonga cya mbere cya Miss Rwanda 2021. Azaba kandi Ambasaderi w’iki kigo umwaka wose.
