Ba Nyampinga 20 bari mu mwiherero wa Miss Rwanda 2021 baganirijwe ku kwihangira imirimo
Umuyobozi Mukuru wa Volcano, Mugabo Nizeyimana Olivier, yaganirije ba Nyampinga bahatanira ikamba rya Miss Rwanda 2021 ku ngingo yo kwihangira umurimo no gukora ‘business’ zikemura ibibazo.
Nizeyimana Olivier ni rwiyemezamirimo akaba n’umushoramari ukiri muto umaze kwiteza imbere abikesha ishoramari mu gutwara abagenzi mu modoka. Kompanyi ya Volcano Express akuriye ni yo izahemba igisonga cya kabiri muri Miss Rwanda 2021.
Umuyobozi Mukuru wa Volcano wari kumwe na Madame we Chantal Rwemarika bagiranye ikiganiro na ba Nyampinga kijyanye no kwihangira umurimo. Mugabo Nizeyimana Olivier unahagarariye Hyundai mu Rwanda, yasobanuriye ba Nyampinga ko yashinze Kompanyi ya Volcano mu mwaka w’1999 akiga muri Kaminuza.
Volcano ni ikigo gitanga serivisi zo gutwara abantu n’ibintu mu modoka rusange mu Rwanda. Mu myaka irenga 20 imaze itwara abantu n’ibintu, Volcano Express Ltd yaranzwe n’ubunyamwuga, gutanga serivisi nziza ku bayigana no kugendera ku gihe.
Umuyobozi Mukuru wa Volcano yabwiye ba Nyampinga ko ‘business’ itangirira ku gitekerezo, kandi kikaba igitekerezo kije gutanga igisubizo cy’ikibazo. Ngo yatangije Volcano Express agamije kugira uruhare mu gukemura ikibazo cyari muri servisi yo gutwara abantu.
Mugabo Nizeyimana Olivier yabwiye ba Nyampinga ko muri ‘business’ iyo ari yo yose habamo ibibazo. Ngo ariko rimwe na rimwe ikibazo gishobora kuvamo amahirwe. Yasabye ba Nyampinga kwigirira ikizere, no guhitamo umushinga biyumvamo mu gihe cyose bahisemo kuba ba rwiyemezamirimo.
Volcano ikorera mu turere twa Muhanga, Ruhango, Nyanza, Huye, Nyaruguru, Nyamagabe, Kanyaru ndetse na Kigali – Rusizi. Volcano Express yaguye imipaka kuko ibasha kugera Kampala muri Uganda na Bujumbura i Burundi.
