REGISTRATION

about

News

Abahatanira Miss Rwanda 2016 basuye Cogebanque, umuterankunga w’imena (Amafoto)

Abakobwa 15 bahatanira ikamba rya Nyampinga w’u Rwanda basuye icyiciro gikuru cya Cogebanque, baganiriye n’ubuyobozi bubabwira ko butewe ishema n’inkunga iyi banki yatanze muri iri rushanwa.


Abashakishwamo Nyampinga w’u Rwanda, basuye umuterankunga mukuru w’irushanwa ku gicamunsi cyo kuri uyu wa Gatatu tariki ya 24 Gashyantare 2016.


Mu kiganiro n’aba ba Nyampinga, Umuyobozi w’agateganyo wa Cogebanque, Muremangingo Rachid yavuze ko iyi Banki yishimira gufatanya n’igihugu mu bikorwa by’iterambere ari nayo mpamvu yemeye gutanga igishoboka cyose ngo hatorwe Nyampinga uzajya userukira u Rwanda mu mahanga.


Ati “Twe nka Banki nyarwanda, ikorera mu Rwanda, dushyigikiye iterambere cyane cyane urubyiruko twishimira kubona ruteye imbere.”

Arongera ati “Murabizi ko dukorana na Minisiteri y’Umuco, ni ngombwa ko mubiha agaciro, aho muzajya guhagararira u Rwanda muzaduheshe ishema, ntituzabone Miss utazi kuvuga Ikinyarwanda, mugomba kukimenya kandi neza […] ururimi rufite agaciro mu muco wacu.”

Muremangingo Rachid yabwiye aba bakobwa ko Banki ya Cogebanque itewe ishema n’inkunga yatanze mu irushanwa rya Nyampinga w’u Rwanda ndetse ngo izakomeza kuba hafi uzatorwa cyo kimwe n’abandi bazatanga imishinga ifatika bazahabwa inkunga.

Cogebanque itewe ishema n’inkunga yatanze

Ati “Guteza imbere umwana w’umukobwa, ngira ngo mubona ingufu Madame Jeannette Kagame ashyiramo, natwe nka banki nyarwanda ifite abayobozi b’Abanyarwanda, abashoramari b’Abanyarwanda, nta kuntu tutatera inkunga abana b’Abanyarwanda. Ni byo abayobozi bacu bashyize imbere natwe tugomba kubishyigikira […] Dutewe ishema n’iki gikorwa, kandi tuzabikomeza.”

Uwitwa Isimbi Eduige, yabajije icyerekezo kiruta ibindi Cogebanque ifite, Umuyobozi w’agateganyo amusubiza ko iyi banki irangamiye kuza kuva ku mwanya wa kabiri ikajya ku isonga.

Ati “Njye natangiye akazi muri Cogebanque ari iya nyuma, ubu mu myaka 15 ni iya kabiri mu Rwanda, turi gutekereza kure.”


Mujyambere Louis de Montfort, Umuyobozi ushinzwe ubucuruzi yashimangiye ko Cogebanque nk’umuterankunga w’imena wa Miss Rwanda 2016 yateye inkunga iri rushanwa mu rwego rwo kugeza umwari w’u Rwanda ku iterambere rirambye.

Yasobanuriye aba bakobwa serivisi zitangwa n’iyi banki harimo kwakira abakiriya bashya nta kiguzi, gutanga inguzanyo (yo kwiga, kubaka, kugura inzu…), gufasha Abanyarwanda kuzigama umutungo wabo n’ibindi.

Mu mwaka wa 2016, Cogebanque izafungura amashami ane mashya mu gihugu yiyongera ku yandi arenga makumyabiri akorera mu Rwanda. Iyi Banki inafite intego zo kwagurira ibikorwa byayo muri Afurika y’Uburasirazuba.

Cogebanque yageneye Nyampinga ibihembo bikomeye

Cogebanque ni banki nyarwanda y’ubucuruzi yemewe na Banki Nkuru y’Igihugu (BNR) kuva mu 1999 ifite amashami mu gihugu hose ndetse ubuyobozi burateganya kwagurira ibikorwa byayo muri Afurika y’Uburasirazuba.

Mu bihembo Nyampinga w’u Rwanda azahabwa harimo umushahara wa buri kwezi ungana n’amafaranga 800,000 mu gihe cy’umwaka n’imodoka y’agaciro yo mu bwoko bwa Suzuki SX4. Byose bizatangwa na Cogebanque.

Iyi modoka yamaze kugezwa mu Mujyi wa Kigali, ni nshya, nta kilometer na kimwe iragenda. Yaguzwe na Cogebanque ndetse abakobwa bayisuye aho iparitse mu Mujyi rwagati.

Imiterere y’iyi modoka


Suzuki SX4 ni imodoka y’ivatiri ifite inzugi eshanu, igendera ku mapine ane 4X4. Yakorewe muri Hongiriya mu mwaka wa 2006 nyuma iza kongera gukorerwa ivugurura mu mwaka wa 2010 biyongerera ubwiza no gukundwa na benshi.

Inywa lisansi cyangwa, ifite moteli ya Cylindres enye(4) itereye imbere. Ijyamo vitesi zishyirwamo na shoferi 6 cyangwa 4 zijyanamo. Igenda ku muvuduko wa kilimotero 180 ku isaha(km180/h).

address
Kigali - Rwanda
KG 23 St, No 5
Phone
+250 788-625-208,
Email
info@missrwanda.rw